Kamis, 18 Agustus 2011

PANTUN KERINCI

kue sangko manih munanggung
di bao ke kayu aro naik bendi
ku sangko gadih duduk timenung
kironyo jando idak bugigi

anak cino idak jadi pegi
nalak antan dekat mushala
glak ntino idak bugigi
ngimak nyantan masuk sikula


kalu idak tau minyak zaitun
cubo belyar ke arab saudi
klu idak tau kayo bupantun
cubo belajar dkat bupati

juan spilo di balai rebu
nyo di juan mak joko
bia kami gilo sulin bambu
samo bae dingan gaek iko

pio kudo burentak bae
nyo ngimak rebung dekat sekam
pio pumudo iko glak bae
nyo tikimak tai idung ikolah itam

kalu kayo nganta anak kelinci
asal kubangan jauh dari biri-biri
kalu kayo ranta idak balik kinci
asal sumbangan banyak kayo beri

mano nalak sibuah pisang
dalak di kemantan sebelah umah tukiyem
manen idak klua isang
ngimak nyantan pgi ke dugem

kalu itik yo sibena itik
pio rebung ditebang sebelah
kalu cantik yo sibena cantik
pio idung iko gdang sibelah

burung tiung diateh bukit
burung murai diateh batu
minin badan munanggung nasib
ulah purangai iko ngan dulu

sikuang karang lahdikarang
nyo dikarang sililit benang
klu nak buang, buanglah sikarang
tau hati kami agi senang

kalu elang mak samo elang
nyo tirebang ladilangit tinggi
kalu ilang bialah samo ilang
samolah di cari dipunyejuk hati

sari kayo dingan timedak
buah kawo dicampu cok;at
bukan iko ngan sigalo idak
iko tu nian dingan plat

rentak kudo didekat pasa
koto tuo ngan koto lebu
anak mudo-mudo yo sibena mada
uhang tuo nyu kato I HATE YOU

mano nalak umpun pisang
nyo ado di koto lebu
mano idak glak klua isang
nenga ntino lah ngato I LOVE YOU

bukan cengkeh luhuh sepuluh bususun
anak gajah di dekat lolo
bukan maleh ku nguruh dusun
awak payah di upat plo

kami payah negak bilik padi
kironyo tibako di dalam kain pulo
kami payah balik kinci
kironyo iko lah kawin pulo

jalan semak kebukit tinggi
semak jugo jalan keterutung
jangan mamak bukecik hati
ngimak nakan milih nak datung

mli bungo limo setangkai
pio mli sibungo tali
iko mandi limo kali sahai
pio agi bau terasi

jangan nalak buah spilo
iluk nalak rambutan bae
jangan iko bnayak nian kato
iluk iko balikan bae

kalu situ ado sanjato
bao sanjato kebalai senin
kalu itu katonyo iko
moh kito kito lahi minin

jangan kipeh dibao sepuluh
iluk dibeli ngan sirupo
jangan bheh ngan iko suhuh
piuk ngan kuali bae idak ku lupo

pio gigi ku silu nian
same timakan sipilo tali
pio hati kami rindu nian
sampe bayangan iko ado dikuali

bentuknyo gepuk sabut ngan tibako
sebab tibako ado ditepi jerami
untuk apa nepuk banta nyebut namo iko
sebab iko ado dalam mimpi kami

tanam kawo di koto tuo
kawo ditanam dingan tibako
bukan uwo pandai bukato
apo ngan uwo kato ado dibadan iko

pio uhang nalak tibako bae
uhang nalak lengkuas ngan bubiji
pio uhang nalak iko bae
uhang ngimak mas ado dkat gigi

untuk apo kito kemudik
kalu cuma ngimak angso
untuk apo uwo cedik
kalu cuma nambah ka duso

sirih bukan sembarang sirih
sirih ado dibawah kawo
milih bukan sembarang milih
kami milih mintua ngan burado

ambik jerami ditepi gao
jerami ado didalam payo
bukan kami ngan tinggi sliho
kami ndak nyubo jadi uhang kayo

tanam salak dingan tibako
ambik peti tulung dibao
mano nalak gantinyo iko
sampi ku mati idak busuo

kami payah di keja angso
angso ado di umpun klapo
kami payah ngaja iko bumudo
pio minin kami dilupo

idak itik dimuaro imat
itik dibao kesuko pangkat
idak nantik ahi kiamat
tantik bae uwo ado pangkat

uhang koto tuo tgak dikoto mejidin
nyo mumbao tibako dalm jahi
kalu uhang tuo idak ngizin kito kawin
bia ku bao iko kawin lahi

kekoto kreh truh koto majidin
itik banyak kno rudal galu
iko kreh ngajak uwo kawin
tantik ka uwo nalak modal dulu

manen idak semak banyak di tibako
ktak batang dingan empat
manen dak mamak ku ajak lago
mintak ukok sabatang idak ku dapat

kain sarung masuk dikutempat
kain cino ndak dibao smiang
ae datung tunjuk dikutempat
kumano aku nak kayo buang

burung dapat ketutu butali
masang jhat diladang cino
datung dapat nantu petani
nakan bupangkat ngan kayo hino

bia smak umpun kulapo
bao anak duduk dipematang
bukan mamak maleh munyapo
tiap busuo mintak ukok sebatang

semak ladang uhang suko pangkat
rebung dalam semaklah dicabut pulo
ngimak nakan jadi uhang bupangkat
datung ngan mamak lah burebut  pulo

simerap dingan tanjung pauh
bao siikat sibungo cino
iko ngarap uhang ngan jauh
uwo ngan dkat tabia murano

ketanjung pauh naik bendi
bendi rami disungai liuk
uhang jauh pandai mumikat hati
tapi kami bisa mna iko mabuk


3 komentar:

  1. NGIN MERASAKAN KEMENANGAN DI DALAM BERMAIN TOGEL TLP KI ANGEN JALLO DI NMR (_0_8_5_2_8_3_7_9_0_4_4_4_) JIKA INGIN MENGUBAH NASIB KAMI SUDAH 7X TERBUKTI
    TRIM’S ROO,MX SOBAT


    NGIN MERASAKAN KEMENANGAN DI DALAM BERMAIN TOGEL TLP KI ANGEN JALLO DI NMR (_0_8_5_2_8_3_7_9_0_4_4_4_) JIKA INGIN MENGUBAH NASIB KAMI SUDAH 7X TERBUKTI
    TRIM’S ROO,MX SOBAT

    BalasHapus
  2. bagus jugo postinyo tambah terus kreasinya.
    jangan lupa mampir .amsal27.blogspot.com

    BalasHapus